Thursday, 7 September 2017

అమ్మ చీర కొంగు....

ఈ రోజు నా facebook స్నేహితురాలైన "శ్రీ వెంకట గాయిత్రి" Timeline లో ఈ క్రింది పోస్ట్ చూడటం జరిగింది. ఎవరు రాశారో గాని  "అమ్మ చీర కొంగు" అనే విషయం మీద ఇంత అద్భుతమైన వాక్యాలు ఇంత వరకు నేను వినలేదు..చదవలేదు. నాకు చాలా చాలా నచ్చింది. ఇందులోని పదాలు, వాక్యాలు అక్షర సత్యాలు. మళ్ళీ మళ్ళీ చదవాలనిపిస్తుంది. ప్రతీ వాక్యం మనసుకు హత్తుకునేలా ఉంటుంది.

Facebook Timeline లో పోస్ట్ చేసినవారు " శ్రీ వెంకట గాయత్రి  "

#మా అమ్మ (చీర) కొంగు#
***************

ఇప్పటి పిల్లలకు చాలా మందికి తెలియకపోవచ్చు. ఎందుకంటే నేటి మమ్మీలు చీరకట్టు తక్కువే.
చీరకొంగు చీర అందానికే సొగసును పెంచేె మకుట మాణిక్యం !
అంతేకాకుండా ..పొయ్యి మీద వేడి గిన్నెలను దింపడానికి పనికొచ్చే ముఖ్య సాధనం !
పిల్లల కన్నీటిని తుడిచే ముఖ్యమైన పరికరం.
చంటిపిల్లలు పడుకోడానికి అమ్మ ఒడి పరుపు కాగా వెచ్చటి దుప్పటి‌ చీరకొంగే !
కొత్త వారు ఇంటికొచ్చినపుడు సిగ్గు పడే పిల్లలు ముఖం దాచుకునేది 'అమ్మ కొంగు' వెనకే !
అలాగే పిల్లలు ఈ మహా చెడ్డ ప్రపంచంలో కొత్తగా అడుగు లేస్తున్నప్పుడు అమ్మ కొంగేే పెద్ద దిక్సూచి, మార్గదర్శి !
అలాగే వాతావరణం చలిగా ఉంటే అమ్మ కొంగుతోనే పిల్లలని వెచ్చగా చుట్టేది !
వంటచేసే తల్లి చెమట బిందువులు తుడుచు కొనేది కొంగుతోనే !
వంటకు పొయ్యిలోకి తెచ్చే కట్ట ముక్కలు సూదులు తెచ్చేది కొంగులోనే !
అలాగే పెరటి తోటలో కూరగాయలు, పువ్వులు, ఆకుకూరలు వంటింటికి తీసుకొచ్చేది కొంగులోనే !
అంతేకాదు ఇల్లు సర్దడం లో భాగంగా పిల్లల ఆట వస్తువులు పాతబట్టలు వంటివి చీర కొంగు లోనే కదా మూట కట్టేది !
ఇలాంటి ఎన్నో ఉపయోగాలు ఉన్న అమ్మ చీరకొంగు లాంటి వస్తువు మరొకటి కనిపెట్టాలంటే చాలా కష్టం !
ఇంతటి అద్భుతమైన అమ్మకొంగు లో కనిపించేది మాత్రం అమ్మ ప్రేమే !!

అంకితం: చీర కట్టే అమ్మలందరికీ !!

Tuesday, 5 September 2017

హైదరాబాద్ లోని పాత బస్తీ పచ్చని అందాలు...

గమనిక:- ఈ పోస్ట్ లోని ప్రతీ ఫోటోగ్రాఫ్ నేను స్వయంగా తీసినదే.

హైదరాబాద్ పేరు వినగానే బిర్యాని, ముత్యాలు, చార్మినార్ - గోల్కొండ - సాలార్ జంగ్ వంటి చారిత్రక కట్టడాలు గుర్తుకొస్తాయి. వీటికి ఓల్డ్ సిటీ ( హైదరాబాద్ పాత బస్తీ ) చాలా ప్రసిద్ది. హిందూ-ముస్లిం అనే భేదాలు లేకుండా కలిసి మెలిసి ఉంటారు. పండగలు ఇంకా ఏ సంభరాలైనా కలిసి జరుపుకుంటారు... ఇక నా వరకైతే వీటన్నింటితో పాటు పాత బస్తీ లో అక్కడక్కడా కనిపించే పచ్చదనమంటే చాలా చాలా ఇష్టం. నేనేమి అంత పెద్ద ఫోటోగ్రాఫర్ ని కాదు. కాని ఫోటోగ్రఫీ అంటే చాలా ఇష్టం. ఈ నా ఫోటోగ్రఫీ కి అస్తమానం నా మొబైల్ బలైపోతుంది ( నా వద్ద కెమెరా లేదు. నా ఆండ్రాయిడ్ మొబైల్ తప్ప. ఫోటో తీయాలని అనిపించినప్పుడల్లా నా మొబైల్ తో పని కానిస్తాను)

క్రింది ఫొటోగ్రాఫ్స్ అన్నీ నేను ఈ మధ్య తీసినవే. మేము ఎక్కువగా పి వి నర్సింహారావు ఫ్లై ఓవర్ నుండి చార్మినార్ దారిలో ప్రయాణిస్తూ ఉంటాము. సంతోష్ నగర్, చాంద్రాయణగుట్ట, చార్మినార్, అఫ్జల్ గంజ్ ఇవన్నీ కూడా పాతబస్తీ పరిధిలోకి వస్తాయి. చాంద్రాయణగుట్ట నుండి చార్మినార్ వెళ్ళే దారిలో రోడ్డుకి రెండు వైపులా ఉండే పచ్చదనం నన్ను కట్టిపడేస్తుంది అని ఎవరితోనైనా చెబితే నవ్వి ఊరుకుంటారు. హైదరాబాద్.. అదీ పాతబస్తీ పచ్చదనమా అనే వెక్కిరింపు తప్పక వారి నవ్వులో కనిపిస్తుంది నాకు. కాని పాత బస్తీ లో ఆ చెట్లు చూస్తే మనసంతా హాయిగా అనిపిస్తుంది. ఎప్పుడో సంవత్సరాల క్రిందటి మొక్కలు ఇలా పెద్ద పెద్ద వృక్షాలుగా దర్శనమిస్తాయి.. ఎవరన్నారబ్బా !!! హైదరాబాద్ కాంక్రీటుమయమని...?!! ఒకసారి క్రింది ఫోటోలు చూడండి... 

Thursday, 31 August 2017

మా ఇంటి ముందు ఉన్న వేప చెట్ల కొమ్మల మధ్య నుండి కనిపిస్తున్న ఉదయిస్తున్న సూర్యుడు



మై కోట్స్ (9)

"మనం ప్రయాణించే మార్గం మంచిదైనప్పుడు, మన మాటలు, చేతలు, రాతలు సరియైనప్పుడు, ఎవరి విమర్శలకు కృంగిపోకూడదు. ఎవరి పొగడ్తలకు పొంగిపోకూడదు."

- జె శ్వేతాగోదావరి (జక్క శ్వేత)©®™



Wednesday, 30 August 2017

మా పెరట్లోని అందమైన "తుమ్మి" మొక్కలు... ఆహా!! వీటిలో ఉన్నాయి భలే ఔషదీయ గుణాలు..


గత మూడు సంవత్సరాల నుండి మా ఇంటి పెరట్లో ఈ తుమ్మి మొక్కలు పెరుగుతున్నాయి. వినాయకుడికి ప్రీతి పాత్రమైనది ఈ మొక్క. ప్రతీ సంవత్సరం వినాయక చవితికి మూడు, నాలుగు నెలల ముందే మొలకలొచ్చేస్తాయి. వినాయక చవితి వరకు గుబురుగా పెరిగి, చిన్ని చిన్ని తెల్లని పువ్వులతో కళకళలాడుతాయి. ఈ తెల్లటి పువ్వుల వల్లే తుమ్మి మొక్క మరింత ఆకర్షణీయంగా కనిపిస్తుంది. మొదట్లో మాకు వింతగా, కొత్తగా, ఆశ్చర్యంగా అనిపించేది ఈ మొక్క మా ఇంటి పెరట్లో పెరగడమేమిటని. అది కూడా మేము వాటికోసం ఎలాంటి విత్తనాలు వేయకుండానే. తరువాత తరువాత మాకు అలవాటయిపోయింది. మా ఇంటికి కొత్త వారు ఎవరొచ్చినా, ఈ మొక్కలని చూసి ఆశ్చర్యానికి లోనవడం ఖాయం. ఎందుకంటే ఈ మొక్క సాధరణంగా ఎవరూ ఇళ్ళలో పెంచుకోరు కాబట్టి. తుమ్మి కూర భలే ఉందని, వినాయక చవితి కి తుమ్మి కూరకు కొరతే లేదని కొంతమంది... చవితి రోజు మాకూ కొంత కావాలని మరి కొంతమంది అంటూ ఉంటారు. వారి మాటలు విని, నివ్వి ఊరుకుంటాము. వీరిలా అంటూ ఉంటే లోలోపలో మాకూ గర్వంగానే ఉంటుంది.మా కాలనీలో ఎవరింట్లో కనిపించని మొక్క మా ఇంటి పెరడులో ఉన్నందుకు. మీరు చూస్తున్న ఫొటో నేను తీసిందే.. వినాయక చవితికి ముందు వారమే, ఈ సంవత్సరం గుర్తుగా ఉంటుందని ముందుగానే క్లిక్ చేసి పెట్టుకున్నాను. అదే మీరు చూస్తున్నది. చవితి రోజు వినాయకుడిని పూపత్రితో పూజిస్తాము. అందులో "తుమ్మి" ఒకటి. పండుగ రోజు ఈ మొక్కలని మేము పూజకోసం వాడతాము.. అంతేకాకుండా ఆచారం ప్రకారం ఆ రోజు ఈ మొక్క ఆకులని పప్పు లేదా చింతకాయలతో కలిపి వండుతాము. భలే రుచిగా ఉంటుంది.

Monday, 28 August 2017

మై కోట్స్ (8)

"అకారణంగా మన మనసును ఎవరయినా తమ మాటలతో, చేతలతో గాయపరిస్తే, భరిస్తూ బాధపడుతూ కూర్చోవడమెందుకు? పదే పదే తలచుకుని కృంగిపోవడమెందుకు? మన చిరునవ్వే వారికి సమాధానమవ్వాలి. రెట్టించిన ఉత్సాహంతో ముందుకు సాగాలి.
అంతకంటే ముందు మన మనసుని బాధపెట్టిన వారిని క్షమించమని ఆ దేవుడిని ప్రార్థించాలి."

- జె శ్వేతాగోదావరి (జక్క శ్వేత)©®™



Monday, 21 August 2017

మా ఇంటి వద్దనున్న అమ్మవారి గుడి ప్రాంగణంలోని వేప మరియు రావి చెట్టు..

మా ఇంటి వద్దనున్న అమ్మవారి గుడి ప్రాంగణంలోని వేప మరియు రావి చెట్టు. మా వాకిట్లో నిలబడి చూస్తే ఇలా కనిపిస్తుంది. ప్రతీ రోజు ఉదయం మరియు సాయంత్రం వినిపించే గుడి గంటల చప్పుడు వింటూ ఉంటే మనసంతా భక్తిమయం అవుతుంది. వీచే గాలికి రావి , వేప చెట్టు యొక్క కొమ్మలు, ఆకులు కదులుతున్న చప్పుళ్ళు చెవికి వినుసొంపుగా అనిపిస్తాయి. ఉదయం, సాయంత్రం పక్షుల కిలకిలరావాలు... ఆహా!! ఎంత బాగుంటుందో స్వయంగా అనుభవిస్తే కాని తెలియదు..



Thursday, 1 June 2017

అందమైన ఈ రేయి...



అందమైన ఈ రేయి
గిలిగింతలు పెట్టే ఈ చల్లగాలి
మా ఇంటి వాకిట్లో
మల్లె తీగ సందడి
దాని పూల పరిమళంతో
నా మనసంతా ఎంతో హాయి

ఆ చుక్కలంటే నాకిష్టం
ఆ ఆకాశం నా నేస్తం
ఆకాశాన్ని అందుకోవాలి
చుక్కలను నా గుప్పిట్లో నింపుకోవాలి
ఈ వెన్నెల రాత్రి ఒడిలో
ఆ చంద్రుడితో మాటాడుతూ
ఈ పిల్లగాలి గుసగుసలు వింటూ
గోదావరి నుండి జాలువారే
ఈ అక్షరాల జలపాతంలో
నన్ను నేను మరచిపోయి
తడిసి ముద్దయిపోవాలి

By :- జె శ్వేతాగోదావరి (జక్క శ్వేత)©®™
Wrote on :- 30/05/2017 

Monday, 29 May 2017

కొంపముంచిన నా పిసినారితనం.... 😕😕😕😓😓






మీరు చదివింది నిజమే. నాకు ఇంతకుముందు  ఒకే ఒక్క  నా పిసినారితనం. ఇది కొన్ని సందర్భాలలో నాకు మంచి చేసినా, చాలా సార్లు దెబ్బతీసింది. నా చిన్నప్పుడు మా కుటుంబం అనుభవించిన పేదరికం నన్ను ఈ స్థితికి తీసుకొచ్చింది. పొదుపు..పొదుపు..పొదుపు......... చివరికి పిసినారితనం. ఇలా నా నరనరాల్లో జీర్ణించుకుపోయింది. దెబ్బతిన్న ప్రతీసారి అలవాటు మానాలనుకొని నాకు నేను శపథం చేసుకున్నా కూడా కుక్క తోక వంకరలా మళ్ళీ మళ్ళీ అదే పద్దతి. (ఇప్పుడు కాదు.అప్పుడు..)


ఆ మధ్య Facebook లో ఒక అన్నయ్య పరిచయమయ్యారు. పేరు పవన్ కుమార్ (పేరు మార్చాను). మంచి కవి, రచయుత, తెలంగాణా వాది. అప్పుడప్పుడూ వారితో Facebook లో సంభాషించేదాన్ని(Chatting).

ఒకరోజు అన్నయ్య తాను రాసిన కొత్త కథ యొక్క pdf లింక్ నాకు Inbox లో పంపిస్తూ, "ఇది ప్రచురణ కాబోయే కథ. ఒకసారి చదివి నీ అభిప్రాయం చెప్పు" అని మెసెజ్ పెట్టారు. నేను ఆ మెసెజ్ చదివి బదులుగా pdf యొక్క వివరాలు అడిగాను. అనగా pdf size, ఎన్ని బైట్లు కలిగి ఉందో చెప్పమన్నాను. ఈ ప్రశ్న నేను కాదు..నాలో ఉన్న పిసినారితనం అడిగేలా చేసింది(నెట్ బ్యాలెన్స్ ని కూడా kbల్లో లెక్కిస్తూ పొదుపుగా వాడుకోవడం నా అలవాటు).

నా ప్రశ్నకి బదులుగా అన్నయ్య నుండి మెసెజ్ వచ్చింది "ఎక్కువేమి లేదు. 1mb లోపే ఉంటుంది." అని చెప్పారు. చలో చాలా తక్కువే అని ఊపిరి పీల్చుకొని, ఆ కథ యొక్క pdf ఫైల్ ని download చేశాను. అన్నయ్య అన్నట్లు గానే ఫైల్ size చాలా చిన్నది. "సంతోషం" అని మనసులో అనుకొని, పని మొత్తం పూర్తి చేసుకుని సాయంత్రం చదవాలనుకొని నిర్ణయించుకున్నాను.

Sunday, 21 May 2017

మరో ఉగాది...




మండు వేసవిలో చల్లని గాలిలా...
ఎడారిలో వర్షపు చినుకులా..
మీ అక్షరాల జల్లులతో
నా మనసు పులకరించే,
అచ్చ తెనుగు కవితతో
మరోసారి ఉగాది నన్ను పలకరించే.

By:- జె శ్వేతాగోదావరి (జక్క శ్వేత)©®™

Sunday, 5 February 2017

మై కోట్స్ (7)

"గంటల తరబడి, రోజుల తరబడి చేయాలనుకుంటున్న కార్యం  గురించి ఆలోచిస్తూ కూర్చోవడం కంటే, ఒక అడుగు ముందుకు వేసి ఆలోచనతో పాటు ఆచరణను కూడా అమలుపరిస్తే మనమెంచుకున్న కార్యం తప్పకుండా ఫలిస్తుంది."

By :- జె శ్వేతాగోదావరి (జక్క శ్వేత)©®™



మై కోట్స్ (6)

సమయం ఎంత విలువైనదో, అది మన చేజేతులారా దుర్వినియోగం అయినప్పుడు మాత్రమే మనకు తెలిసి వస్తుంది.

~ జె. శ్వేతాగోదావరి (జక్క శ్వేత)©®™



Saturday, 4 February 2017

మై కోట్స్ (5)

మనం భూమిమీద పడిన మరుక్షణం నుండి మనల్ని అల్లారుముద్దుగా, జాగ్రత్తగా కాపాడుకుంటూ, పెంచి పెద్దచేసి, మనల్ని ఇంతటివారిని చేసిన మన తల్లిదండ్రులు వృద్ధాప్యంలో మనకు వారు చంటిపిల్లలతో సమానం. స్థితిలో వారింజ్ కంటికి రెప్పలా కాపాడుకోవాల్సిన బాధ్యత మనదే అని తెలిసి కూడా, మనల్ని కన్న మన తల్లిదండ్రుల పట్ల ఎందుకింత మనకు విముఖత? విముఖతే లేకపోతే వృద్ధాశ్రమాలు అసలు ఉండేవి కావేమో !!

- జె శ్వేతాగోదావరి (జక్క శ్వేత)©®™



Tuesday, 31 January 2017

మై కోట్స్ (4)

" డబ్బు, ఆస్తులు, అంతస్తులు, చదువులు, బంధాలు - బంధుత్వాలు, ప్రేమలు, స్నేహాలు ఎన్ని ఉన్నా కూడా, వ్యక్తికి తన జీవితంలో కనీస స్వేచ్ఛా- స్వతంత్రత లేకపోతే, అవి అన్నీ ఉన్నప్పటికీ ఆ వ్యక్తి జీవితం ఒక బానిస జీవితంతో సమానం. "
# జె. శ్వేతాగోదావరి (జక్క శ్వేత)©®™



Monday, 30 January 2017

మై కోట్స్ (3)

" ఎల్లప్పుడూ అబద్ధాలు చెబుతూ అందర్నీ మోసం చేసే వ్యక్తికి, ఎదుటివారు చెప్పే నిజాలు అబద్దపు మాటలుగా తోచడంలో ఆశ్చర్యమేమీ లేదు. ఇలాంటివారు ఆ సత్య హరిశ్చంద్రుని మాటలను కూడా నమ్మలేరు. "
# జె శ్వేతాగోదావరి (జక్క శ్వేత)©®



Thursday, 19 January 2017

నాకు వజ్రాలు దొరికాయోచ్....

నాకు వజ్రాలు దొరికాయోచ్...!!!  :)
నిజమేనండి.. మా పెరట్లోనే... :) గత నెలలో.
ఉదయం నిద్రలేచి బయటికి వచ్చి బ్రష్ చేసుకుంటూ ఉండగా..మా పెరట్లోని పచ్చని గడ్డి వైపు నా దృష్టి పడింది. ముందే చలికాలం.. రాత్రి కురిసిన పొగమంచు వల్ల ఆ పచ్చని గడ్డిపై మెరుస్తున్న వజ్రాల్లాంటి నీటి బిందువులు(హిమ బిందువులు) కనిపించాయి. అప్పుడే ఉదయిస్తున్న సూర్యుని కిరణాలు ఆ నీటి బిందువులపై పడి, అవి నిజంగా వజ్రాలేమోనన్న అనుమానం ఒక్క సెకను కాలం పాటు నాకు కల్గింది. ప్రకృతి యొక్క ఈ అద్భుతమైన దృష్యాన్ని నా కెమారాలో బంధించాను. వీటి కన్నా అమూల్యమైన వజ్రాలు ఇంకెక్కడ దొరకుతాయి చెప్పండి. బావున్నాయి కదా!!!! ☺☺




బంగారు వర్ణంలో మెరుస్తూ ఎంత అద్భుతంగా ఉందో కదా!!!